ადამიანი ცნობილია თავისი ცნობისმოყვარეობით, მოუსვენრობითა და ახლის ძიების სურვილით. იგი არ კმაყოფილდება მიღწეულით და მუდმივად ახალ მიზნებს ისახავას. გასული საუკუნეების ბევრი "თავში მოსული” იდეა რეალობად იქცა და ისინი ახლებმა ჩაანაცვლა.

• 1. თვითმართვადი მანქანა

ყველაზე სახიფათო ნაწილი ავტომანქანაში თავად მძღოლია. იგი მანქანის ტარებისას არ იკლებს ჭამას, სმას, კითხვას, ტელეფონზე საუბარს, მაკიაჟის კეთებას და ფრჩხილების მოწესრიგებასაც კი. 1990 წლიდან მოყოლებული აშშ–ს სატრანსპორტო დეპარტამენტის დაფინანსებით მუშავდება სხვადასხვა პროექტები, რათა მაქსიმალურად იქნას შემცირებული ადამიანის მონაწილეობა მანქანის მართვისას. NAHSC–მა უკვე მნიშვნელოვან წარმატებებს მიაღწია რადარისა და მაგნიტურ–ვიზუალური სენსორების გამოყენებაში. უკვე მრავალი კომპანია დაინტერესდა ამ იდეით, მითუმეტეს, რომ 3 მილიონი დოლარია გამოყოფილი საუკეთესო პროექტის დასაჯილდოვებლად.

ყველაზე ინტენსიურად ამ მიმართულებით AUDI და Google მუშაობენ. გუგლის მკვლევართა განცხადებით, მსგავსი მანქანების პრაქტიკული გამოყენება როგორც მინიმუმ, 2018 წლამდე ვერ მოხერხდება.

• 2. მფრინავი მანქანა

მფრინავი მანქანის იდეა კაცობრიობას დიდი ხანია აწუხებს. ჯერ კიდევ 1917 წელს გლენ კურტისს ჰქონდა მცდელობა აეგო პირველი ავტოპლანი, რომლის დიზაინი დღემდე გამოიყენება თანამედროვე პროექტებში.

თუმცა იმისათვის, რომ ასეთი მანქანები მართლაც პრაქტიკული და კომფორტული იყოს, პირველ რიგში მათ უნდა შეეძლოთ ადგილიდანვე ჰაერში აწევა ზედმეტი ხმაურისა და ეფექტების გარეშე. ასევე მათი მანევრირება, საჭიროებისამებრ ჰაერში გაჩერება და ერთ ადგილას „ლივლივი" სერიოზულ ანტიგრავიტაციულ მექანიზმებს საჭიროებს. მიუხედავად იმისა, რომ 2002 წლისთვის NASA –მ ამის თეორიული შესაძლებლობების შესახებ ნაშრომები წარმოადგინა,  მეცნიერულ–ტექნოლოგიურ წრეებში ეს იდეა დაცინვის საგანიც კი გახდა. იმედი ვიქონიოთ, რომ სადღაც „გულში" მეცნიერებს მაინც არ ასვენებთ ეს საკითხი და ფარულად (როგორც ეს მათ სჩვევიათ) აწარმოებენ კვლევებს ამ მიმართულებით.

• 3. წყალქვეშა ქალაქი

ადამიანებს უხსოვარი დროიდან იზიდავდა ოკეანეების მისტიური სიღრმეები. არც თანამედროვე ადამიანს განელებია ინტერესი ლაჯვარდოვანი ზღვისქვეშეთის მიმართ, მაგრამ წარმოდგენები მკვეთრად შეიცვალა – ატლანტიდა და ქალთევზათა სამყარო წყალქვეშა მეტროპოლისებმა და კოლონიებმა ჩაანაცვლა.

ჯერ კიდევ 1950–60 წლებში ჟაკ კუსტომ შექმნა პირველი მონახაზი და აშშ–ს საზღვაო კვლევითმა ლაბორატორიამ ამ იდეის განხორციელება დაიწყო. იმ პერიოდშივე დადგინდა, რომ ადამიანს, შესაბიმის პირობების შექმნით, მართლაც შეუძლია საკმაოდ ხანგრძლივი  პერიოდით წყალქვეშ ცხოვრება.

მას შემდეგ ნახევარი საუკუნე გავიდა, მაგრამ წყალქვეშ პატარა სოფელიც კი არ გვაქვს. მართალია, უკვე შეიქმნა დუბაის წყალქვეშა ჰიდროპოლისის მსგავსი გრანდიოზული პროექტები, მაგრამ კიდევ მრავალი ათწლეული ეს „შენობა" პროექტად დარჩება, რადგან იქ ცხოვრება, გარდა იმისა, რომ საშინლად ძვირი ჯდება, არავითარ აუცილებლობას არ წარმოადგენს.

მაქსიმუმ რისი განვითარებაც ახლო მომავალში წარმოსადგენია, ესაა მინისადგურები, ლაბორატორიები და ლიფტები, რომლებსაც ოკეანოგრაფები გამოიყენებენ.

• 4. რობოტი მოსამსახურე

რობოტი შიდამოსამსახურის წინაპრად შეიძლება მტვერსასრუტიც მივიჩნიოთ, თუმცა მას შემდეგ მოთხოვნები გაიზარდა და იდეალური რობოტ–დამხმარე ტულაეტის წმენდასთან ერთად დაბრაწულ ღვეზლებსაც უნდა აცხობდეს. რობოტიკოსები ერთგულად მიყვებიან საკუთარ პრინციპს „თუ ადამიანს რამე სურს, რობოტი ამას გააკეთებს" და იაპონიის ტექნოლოგიურ გამოფენებზე სულ უფრო და უფრო დახვეწილი „ქმნილებები" გამოჰყავთ.

მთავარი მიზანი იდეალური რობოტის განვითარებისას მისი სოციალურობა, ადამიანებთან კონტაქტისა და სიტუაციის მიხედვით ანალიზისა და შესაბამისი ქმედების უნარია, რაც მოითხოვს, რომ რობოტს დამოუკიდებელი აზრონების უნარი უნდა ჰქონდეს. ეს კი ეწინააღმდეგება თავად რობოტის არსს.

• 5. მარსზე გაფრენა

„ერთი ბილეთი მარსამდე, თუ შეიძლება" – ამ წინადადების წარმოთქმას წუთი წუთზე ველოდებით მას შემდეგ, რაც 1969 წელს Apolo 11 მთვარეზე დაეშვა.

1946 წელს კოსმოსის მკვლევარმა გერმანელმა მეცნიერმა დოქტორ ვერნჰერ ვონ ბრაუნმა წარმოადგინა საკმაოდ ზუსტად გათვლილი, 70 ასტრონავტისგან შემდგარი პროექტი მარსზე ქსპედიციისა. რაც არ უნდა გასაკვირი იყოს,  ის დღესაც კი ტექნიკურად ყველაზე გამართულ, დაზუსტებულ და განხორციელებად პროექტად ითვლება. აშშ და რუსეთი ინტენსიურად მუშაობს ამ საკითხზე. შეიძლება ითქვას, რომ არამარტო მეცნიერებისთვის, არამედ პოლიტიკოსებისთვისაც კი, წითელი პლანეტის მონახულება დედამიწელთა ყველაზე მნიშვნელოვანი, ამბიციური და გრანდიოზული მიზანია.

წყარო: verzonti.wordpress.com